Баррасии рушди муносиботи БМТ ва БРЧ

Душанбе, 29.08.2015. (АМИТ “Ховар”). — Масъалаҳои рушди муносибатҳои дуҷонибаи судманд, аз ҷумла таҳияи лоиҳаи Ёддошти тафоҳум оид ба ҳамкорӣ миёни Бонки миллии Тоҷикистон ва Бонки рушди Чин 28 август дар шаҳри Душанбе зимни мулоқоти Гурӯҳи кории Бонки рушди Чин дар ҳайати Фэн Же, Су Чунминг ва Ванг Шаонан бо муовини раиси БМТ Умед Латифов баррасӣ гардид. 
Бонки миллии Тоҷикистон пешниҳод намуд, ки Бонки рушди Чин дар маблағгузории лоиҳаҳои инфрасохторӣ, махсусан энергетикӣ саҳми худро гузорад. Ҳамчунин пешниҳод карда шуд, ки БМТ ҳамчун бонки хизматрасон дар раванди дарёфт ва пешниҳоди лоиҳаҳои афзалиятнок барои маблағгузорӣ ба ҷониби Бонки рушди Чин кумак кунад.
Аз ҷониби ҳайати Бонки рушди Чин нисбат ба масъалаҳои баррасишуда ва ҳамкории минбаъда бо Бонки миллии Тоҷикистон омодагӣ изҳор шуд. 
Аз хадамоти матбуоти БМТ ба АМИТ “Ховар” иттилоъ доданд, ки намояндаи Бонки рушди Чин таъкид намуд, ки бо мақсади рушди ҳамкории минбаъда охири сентябри соли ҷорӣ ҳайати намояндагии ин Бонк барои пешниҳод намудани Ёддошти тафоҳум оид ба ҳамкорӣ миёни Бонки миллии Тоҷикистон ва Бонки рушди Чин ташриф меорад.