Бозии Тоҷикистону Австралияро доварон аз Баҳрайн доварӣ мекунанд

Душанбе, 05.08.2015. (АМИТ «Ховар», Ситораи Боймурод).- Тибқи иттилои Федератсияи футболи кишвар, доварони бозии сабқати гурӯҳии Ҷоми ҷаҳонии футбол-2018 байни дастаҳои мунтахаби Тоҷикистон ва Австралия, қаҳрамони Осиё, ки 8-уми сентябри соли равон дар шаҳри Душанбе, дар Варзишгоҳи марказии ҷумҳурия баргузор мешавад, аз Баҳрайн мебошанд.
Ба иттилои манбаъ, довари ФИФА Ҷамил Ҷумъа Абдулҳусейнин 42-сола сардовари ин бозӣ таъин шудааст. Муҳаммад Ҷаъфар Моуҳаммад Салмони 35-сола ва Наваф Шоҳин Халифа Мӯсои 36-сола ба ҳайси доварони марзи майдон хидмат хоҳанд кард. Абдулазиз Юсуф Абдулло довари эҳтиётӣ хоҳад буд. Масъуд Муродӣ аз Эрон нозири доварон ва Ту Силианг из Чин комиссари ин бозӣ таъин шудаанд.
Ҳоло дар гурӯҳи «В” се даста — Урдун, Қирғизистон ва Австралия се имтиёзӣ, Тоҷикистон ва Бангладеш як имтиёзӣ доранд. Урдун ва Австралия як бозӣ, се дастаи дигар ду бозӣ анҷом додаанд.
Ёдовар мешавем, сармураббии дастаи «Истиқлол”-и Душанбе Мубин Эргашев, ки 28 июли соли равон иҷрокунандаи вазифаи сармураббии мунтахаби миллии футболи Тоҷикистон таъин шуда буд, мунтахаби кишварро ба бозиҳои сабқати интихобии қаҳрамонии ҷаҳон-2018 омода месозад. 
Гуфта мешавад, ки Мубин Эргашев имсол тавонист, дастаи «Истиқлол»-и Душанбе, қаҳрамони секаратаи Тоҷикистонро ба даври чаҳорякниҳоии Ҷоми AFC (Конфедератияи футболи Осиё) барорад. «Истиқлол” муборизаро барои Ҷоми AFC идома медиҳад.