Ифтитоҳи намояндагии Ваколатдор оид ба ҳуқуқи инсон дар Свердловск

      Душанбе, 20.08.2015.(АМИТ «Ховар», Марзия Саидзода).-Ваколатдор оид ба ҳуқуқи инсон дар Ҷумҳурии Тоҷикистон намояндагии худро дар вилояти Свердловски Русия ифтитоҳ кард, ки ҳадафи он ҳифзи ҳуқуқу манфиатҳои шаҳрвандони Ҷумҳурии Тоҷикистон, хусусан муҳоҷирони  меҳнатӣ дар ин вилоят арзёбӣ мегардад.  
         Дар маросими ифтитоҳи намояндагӣ Зариф Ализода- Ваколатдор оид ба ҳуқуқи инсон  дар Ҷумҳурии  Тоҷикистон иштирок намуд. Мавсуф ҳамзамон дар сӯҳбати мизи гирд оид ба «Ҳамкории мақомоти ҳифзи ҳуқуқ дар таҳкими муносибатҳои байни миллатҳо» иштирок ва суханронӣ кард. Дар ин чорабинӣ намояндаи Ваколатдор оид ба ҳуқуқи инсон дар вилояти Свердловски Русия Иқболшо Шабозов муаррифӣ гардид.
       Ҳамзамон омбудсмени Тоҷикистон З. Ализода зимни сафараш ба Русия бо   Ваколатдор оид ба ҳуқуқи инсони вилояти Свердловск  Татяна Мерзлякова, муовини раиси ҳукумати ин вилоят Яков Силин, роҳбарони ҷамъиятҳои тоҷикони муқими Свердловск ва муҳоҷирони меҳнатӣ  мулоқот кард.