Имзои созишнома миёни прокуратураҳои генералии Тоҷикистону Қирғизистон

Душанбе, 28.08.2015 (АМИТ «Ховар»).- Дирӯз дар доираи сафари кории худ прокурори генералии Ҷумҳурии Тоҷикистон  Юсуф Раҳмон ба ҷаласаҳои Шӯрои ҳамоҳангсозии прокуророни генералии кишварҳои аъзои Иттиҳоди Давлатҳои Мустақил ва Созмони Ҳамкории Шанхай, вохӯрии дуҷониба бо Прокурори генералии Ҷумҳурии Қирғизистон Индира Джолдубаева анҷом дод.
Дар рафти вохӯрӣ, масъалаҳои мусоидат ба раванди делимитатсия ва демаркатсияи сарҳади давлатӣ, пешгирии ҳодисаҳо ва муноқишаҳои аҳолии наздисарҳадӣ, дақиқан ва объективона пеш бурдани тафтишоти ҳодисаҳои бавуҷудомада, аз ҷумла созмон додани гурӯҳҳои муштараки тафтишотӣ, бозпас додани маҳбусон — шаҳрвандони якдигар барои адои минбаъдаи ҷазо дар қаламрави Ватани хеш баррасӣ гардиданд.
Дар охир бо мақсади амалан татбиқ намудани масъалаҳои баррасишуда, созишнома байни Прокуратураи генералии Ҷумҳурии Тоҷикистон ва Прокуратураи генералии Ҷумҳурии Қирғизистон оид ба расонидани ёрии ҳуқуқӣ ва ҳамкорӣ ба имзо расонида шуд.