Маҷмӯи машқҳои муштараки амалиётӣ-тактикӣ анҷом ёфт

Душанбе, 20.08.2015. (АМИТ «Ховар»). — Имрӯз, маҷмӯи машқҳои муштараки амалиётӣ-тактикии зиддитеррористӣ, бо тирпаронии ҷангӣ, ки санаи 17 август бо ҷалби сохтору мақомоти давлативу қудратии гарнизони Суғд оғоз гардида буд, дар машқгоҳҳои низомии “Чоруқдарон” ба анҷом расид.
Дар маросими ҷамъбастии машқҳои муштараки амалиётӣ-тактикии зиддитеррористӣ раиси вилояти Суғд — сардори минтақаи мудофиаи ҳудудии рақами 3 Абдураҳмон Қодирӣ ва вазири мудофиаи мамлакат Шералӣ Мирзо иштирок намуданд.
Ёдовар мешавем, ки чорабинии мазкур бо ҷалби 30 ҳазор нафар дар се марҳила, дар машқгоҳҳои низомии “Чоруқдарон” ва “Нурафшон” ба таври назариявӣ ва амалӣ ҷараён гирифта, шаҳрвандони дар қайди комиссариатҳои ҳарбибуда, техника ва лавозимоти барои баргузории маҷмӯи машқҳои амалиётӣ-тактикӣ зарурӣ, ҷалб гардиданд. Машқҳову мавзӯъҳои омӯзишӣ зери назорати вазири мудофиа Шералӣ Мирзо сурат гирифт. Дар чорабинии мазкур тибқи фармони Сарфармондеҳи Олии Қувваҳои Мусаллаҳ «Оид ба тасдиқ ва дар амал татбиқ намудани нақшаи мудофиаи ҳудудии Ҷумҳурии Тоҷикистон», дар асоси нақшаи ягонаи омодагии ҷангӣ раисони шаҳру ноҳияҳои вилоят ва комиссарони ҳарбӣ ширкат намуда, онҳо тӯли се рӯз ба машғулиятҳои омодагии сафарбарӣ, сафороиву қадамзанӣ, тартиби дурусти ҳуҷҷатгузорӣ, тирпарронӣ аз яроқу аслиҳаи сабуки ҷангӣ ва дигар омӯзишҳо ҷалб карда шуданд.
Ҳадаф аз баргузории маҷмӯи машқҳои муштараки тактикӣ сайқал додани таҷрибаи ҳайати шахсии сохторҳои гарнизони Суғд, ҳамоҳанг сохтани фаъолияти сохторҳои низомии мамлакат дар сурати сар задани хатарҳои эҳтимолӣ, санҷиши дастаҳои амалиётӣ-тактикӣ, баланд бардоштани руҳияи ҷангӣ, сафарбарии қушунҳо дар самти доир кардани амалҳои ҷангии зиддитеррористӣ дар шароити дашту саҳро ва кӯҳистон мебошад.
Дар машқҳои муштараки амалиётӣ-тактикии зиддитеррористӣ ҷузъу томҳои сохторҳои қудратии горнизони Суғд, яроқу аслиҳаи мухталифи оташфишон, авиатсияи ҷангӣ ва зиёда аз 200 адад техникаҳои зиреҳпӯши ҳарбию артиллерӣ ва автомобилӣ истифода гардид.
Дар поёни маросими ҷамъбасти машқҳои ҳарбӣ аз ҷониби вазири мудофиаи кишвар Шералӣ Мирзо ба иштирокдорони фаъоли маҷмӯи машқҳо рутбаҳои навбатии ҳарбӣ, сипосномаҳо ва тӯҳфаҳои хотиравӣ тақдим шуд. Ба раиси вилояти Суғд — сардори минтақаи мудофиаи ҳудудии рақами 3 Абдураҳмон Қодирӣ медали ҷашнии 20-солагии мудофиаи Ҷумҳурии Тоҷикистон тақдим карда шуд.