Мубориза бар зидди коррупсия қарзи шаҳрвандии мост

Душанбе,  20.08.2015 (АМИТ «Ховар», Рафоати Абдулҳамид).- Дар асоси барномаи хониши идоравии мақомоти давлатӣ дар моҳҳои июл- ноябри соли 2015, ки аз ҷониби Агентии хизмати давлатии назди Президенти Ҷумҳурии Тоҷикистон тасдиқ гардидааст, ҷиҳати дар амал татбиқ намудани «Стратегияи муқовимат ба коррупсия дар Ҷумҳурии Тоҷикистон барои солҳои 2013- 2020» ба иштироки  кормандони Кумитаи кор бо занон ва оилаи назди Ҳукумати  Ҷумҳурии Тоҷикистон  ва Кумитаи оид ба корҳои дин, танзими анъана ва ҷашну маросимҳои миллӣ машғулияти хониши идоравӣ доир гардид.
Дар ин омӯзиш роҳбарони кумитаҳои зикргардида- иштирок намуда, барои ҳозирин зарурияти баргузор намудани чунин машғулиятҳои омӯзиширо муаррифӣ намуданд. Аз ҷумла, зикр гардид, ки чунин омӯзишҳо барои хизматчиёни давлатӣ баҳри пешгирӣ намудани зуҳуроти номатлуби коррупсионӣ муҳим ва саривақтӣ мебошанд.
Дар машғулияти мазкур ҳуқуқшиноси Кумита Сафаргул Бухориева Қонуни Чумҳурии Тоҷикистон «Дар бораи мубориза бар зидди коррупсия»-ро муаррифӣ намуда, оид ба талаботи қонуни мазкур ва коррупсия- яке аз зуҳуроти хавфноки ҷомеа, ки дар миқёси ҷаҳонӣ ҳамчун ҷинояти вазнин ва яке аз унсурҳои таҳдидкунанда ба амнияти миллӣ ва халалдоркунандаи рушду суботи иҷтимоию иқтисодии давлат эътироф гардидааст, суханронӣ намуд.
Хамзамон, зикр гардид, ки вазифаи ҳар  хизматчии давлатӣ ба дарки ҳар  фард расонидани зарурати мубориза бар зидди коррупсия ва бартараф намудани мавқеи бетарафӣ нисбат ба коррупсия ва бо ҳамин восита ташаккули мафкураи зиддикоррупсионӣ дар ҷомеа мебошад.