Намоиши аксҳо ба ифтихори 70-умин солгарди Ғалаба дар Ҷанги дуюми ҷаҳон

Душанбе, 15.08.2015 (АМИТ «Ховар», Руқияи Боймамад).-Имрӯз дар Китобхонаи миллии Тоҷикистон намоишгоҳи суратҳои аксбардорони Чин ифтитоҳ ёфт, ки дар он ҳайатҳои сафоратхонаҳо, ВКХ, Вазорати мудофиа ва ВАО ширкат доштанд. Ташкилкунандагони намоишгоҳи мазкур Сафорати Ҷумҳурии Мардумии Чин дар Ҷумҳурии Тоҷикистон ва Агентии иттилоотии «Синхуа» мебошанд.

Бино ба иттилои ташкилкунандагон, ин намоишгоҳ ба 70-умин солгарди Ғалаба дар ҷанги дуюми ҷаҳон бахшида шудааст. 
Намоишгоҳи мазкур ба се қисм тақсим мешавад: «Ҷанги зидди фашистӣ ва сулҳи Шарқ», «Ба вуҷуд овардани ягонагии фронти зидди фашистӣ», «Ғалабаи ҷаҳон бар фашизм».

Дар оғози намоишгоҳ Фан Сян Жун сафири Чин дар Тоҷикистон суханронӣ  карда, гуфт: «Имрӯз барои мо басо рӯзи муҳим аст, яъне 70-умин солгарди Ғалаба дар ҷанги дуюми ҷаҳон. Маҳз дар ҳамин рӯз, 70 сол қабл мо ғалабаро ба даст овардем. Дар ин ҷанг зиёда аз 35 миллион шаҳравнди Чин ҳалок шуданд. Мо бояд нагузорем, ки ин гуна ҷанг дар ҷаҳон дубора сар занад. Мо бояд аз ин ҷанг барои худ як дарси ҳаёт омӯзем».

Аксҳое, ки ба маъраз  гузошта шудаанд, таърихи ҳамон ҷанги 70-сол қабл анҷомёфтааст, ки бо кумаки Агентии иттилоотии «Синхуа», Фонди иҷтимоии «Ен Бан»-и Созмони Ҳамкории Шанхай,  Агентии марказии тарҷумаҳолӣ  ва Осорхонаи Шанхай омода шудаанд.  Меҳмонон тавонистанд  онҳоро аз наздик бубинад.

Фан Сян Жун сафири Чин дар Тоҷикистон дар ҷараёни  ин намоишгоҳ гуфт, ҷониби Чин нақша дорад, ки 3 сенятбр дар Пекин бахшида ба 70-умин солгарди Ғалаба   дар ҷанги дуюми ҷаҳон гузашти низомӣ баргузор намояд, ки дар он сарони кишварҳои  хориҷӣ низ иштирок мекунанд.