СММ ғуломфурӯшии ДИИШ-ро тасдиқ кард

Душанбе, 04.08.2015  (АМИТ «Ховар»). — Намояндаи расмии СММ тасдиқ кард, ки гурӯҳи террористии ба ном «Давлати исломӣ» занону кӯдаконро мувофиқ ба нархномаи тасдиқшуда ҳамчун ғулом мефурӯшад. 
Намояндаи махсуси СММ оид ба пешгирии зӯроварии шаҳвонӣ дар минтақаҳои даргир Зайнаб Банғура, изҳор кардааст, ки дар санадҳои дастрасшуда воқеияти фурӯхтани одамон ҳамчун ғулом инъикос ёфтааст, — менависад  хабаргузории «Bloomsberg».
Санади нархномаи асирони ДИИШ бори аввал моҳи ноябри соли 2014 паҳн шуда буд, вале аслӣ будани санад тасдиқи худро наёфта буд. Дар санад нархномаи намояндагони халқияти эзид ва пайравони дини насронӣ, ки ба асорати ДИИШ афтода буданд, дарҷ шуда буд. Аз ҷумла, барои кӯдакони аз 1 то 9 сола 200 ҳазор динори ироқӣ — муодил ба 165 доллари ИМА нарх гузошта шуда буд.  Нархи занони ҷавони то 20 сола 124 доллари ИМА «муайян» шуда, вобаста ба калонсол будани занон нарх пасттар мерафт.
Мувофиқи суханони Зайнаб Банғура, нахуст аз миёни асирафтодагон қумандонҳои ДИИШ барои худ ғулом ҷудо карда мегиранд, сипас занону духтарони асирафтода ба мизоҷон аз Шарқи Наздик фурӯхта мешаванд. Асирзанони боқимондаро ҷанговарони қатории ДИИШ мувофиқ ба нархҳои «таъиншуда» мисли ғулом аз худ мекунанд.