Сохтмони иншооти нав дар Ховалинг

 Ховалинг, 04-08-2015 ( АМИТ «Ховар», Сулаймон Холов).- Дар ноҳияи Ховалинг сохтмон ва азнавсозии якчанд иншоот ба роҳ монда шудааст, ки беш аз сад ҷоиҳои нави кориро фароҳам меорад.
  Ба иттилои роҳбарияти ноҳия дар айни замон  ширкати сохтмонии «Нигини Сулаймон» сохтмони беморхонаи марказии ноҳияи Ховалингро бо  фармоиши Ҳукумати вилояти Хатлон идома дода, то имрӯз 80 дарсади корҳоро ба анҷом расонидааст. 
Дар маркази ноҳия низ соҳибкор Саъдулло Бобоназаров ба сохтмони бинои анбори қабули меваи хушк барои 500 тонна машғул аст.
Ҳамчунин собиқ бинои нонпазхонаи ноҳия, ки дар ҳолати садамавӣ қарор дошт, баъди харидорӣ аз ҷониби соҳибкори ноҳия таъмиру азнавсозӣ гардида, дар назар аст, ки дар як қисмати он сехи дузандагӣ бунёд карда шавад, ки беш аз си нафар занону духтарони маҳалиро бо ҷои кори доими таъмин хоҳад кард.