Тайланд: Дар таркиши Бангкок се хориҷӣ ҳалок гаштанд

Душанбе, 18.08.2015. (АМИТ «Ховар»). — Дар миёни 27 қурбонии таркиши Бангкоки Тайланд се хориҷӣ низ ҳалок гаштаанд. Шаҳрвандии онҳо ҳанӯз ошкор нашудааст.
Бино ба иттилои сомонаи Лента.ру, дар байни 80 ҷароҳатбардоштагон сайёҳон низ будаанд, ки аксарияти онҳо — чиниҳои Ҷумҳурии мардумии Чин ва ҷазираи Тайван мебошанд.
17 август дар минтақаи сайёҳии Бангкок дар наздикии мағозаҳои бузург ва ибодатгоҳи маҳаллӣ — Erawan Shrine таркиш рух дод. Полис ин ҳодисаро ҳамлаи террористӣ номид. Маводи тарканда дар як мототсикл насб карда шуда буд. То ҳол масъулияти ин ҳодисаро касе ба ӯҳда нагирифтааст.
Ба гуфтаи кормандони амниятии ин кишвар, як дастгоҳи таркандаи дигар низ пайдо карда шудааст.