Такмили ҳокимияти судӣ дар даврони истиқлолияти давлатӣ

Душанбе, 26.08.2015. (АМИТ «Ховар»). – Субҳи имрӯз дар Китобхонаи миллӣ бахшида ба 24-умин солгарди истиқлолияти давлатӣ Конференсияи ҷумҳуриявии илмию-амалӣ таҳти унвони «Нақши истиқлолияти давлатии Ҷумҳурии Тоҷикистон дар такмили ҳокимияти судӣ» ба кори худ шурӯъ кард. Конференсияи мазкур бо ташаббуси Шӯрои адлияи мамлакат баргузор шуда, дар кори он раисони Суди Олӣ, Суди конститутсионӣ, Суди олии иқтисодӣ, судҳои ҷумҳурӣ, намояндагони Вазорати адлия, Прокуратураи генералӣ, Маркази миллии қонунгузорӣ, Маркази тадқиқоти стратегӣ, Академияи илмҳо ва ташкилоти байналмилалии муқими Душанбе иштирок доранд.
Тавре зикр гардид, ки баъд аз ба даст овардани истиқлолияти давлатӣ бо ташаббуси бевоситаи роҳбарияти мамлакат баҳри рушд ва такмил додани ҳокимияти судӣ барномаҳои алоҳидаи ислоҳоти судӣ-ҳуқуқӣ қабул гардида, дар амал татбиқ шудаанд. 
«Тақвияти фаъолияти ҳокимияти судӣ яке аз самтҳои асосии сиёсати давлатӣ мебошад, зеро фаъолияти суд бо инсон ва ҳуқуқу озодиҳои ӯ пайванди ногусастанӣ дорад», — таъкид карда шуд дар конференсия.