Вакилон ба Кодекси андоз тағйирот ворид менамоянд

    Душанбе, 21.08.2015.(АМИТ «Ховар», Марзия Саидзода).-Интизор меравад, ки вакилони палатаи поёнии Парлумони Тоҷикистон ба Кодекси андози Ҷумҳурии Тоҷикистон тағйирот ворид намоянд. Масъалаи мазкур дар ҷаласаи Шӯрои  палатаи поёнии Парлумони Тоҷикистон, ки таҳти раёсати Шукурҷон Зуҳуров-раиси Маҷлиси намояндагон доир гардид, баррасӣ шуд.
  Дар ҷаласа аъзои Шӯро инчунин лоиҳаи қонунҳои Ҷумҳурии Тоҷикистон «Дар бораи санҷиши фаъолияти субъектҳои хоҷагидор»,  «Дар бораи ворид намудани тағйиру иловаҳо ба Қонуни Ҷумҳурии Тоҷикистон «Дар бораи низоми иҷозатдиҳӣ», «Оид ба ворид намудани тағйирот ба Қонуни Ҷумҳурии Тоҷикистон «Дар бораи иттиҳодияҳои ҷамъиятӣ», «Дар бораи бақайдгирии давлатии асноди ҳолати шаҳрвандӣ» «Оид ба ворид намудани тағйиру илова ба Қонуни Ҷумҳурии Тоҷикистон «Дар бораи боҷи давлатӣ», «Дар бораи иҷозатномадиҳӣ ба баъзе намудҳои фаъолият»-ро матраҳ намуданд. 
   Аъзои Шӯро ҳамзамон масъалаҳои ворид намудани тағйиру иловаҳо ба Қонуни  Ҷумҳурии Тоҷикистон «Дар бораи бақайдгирии давлатии шахсони ҳуқуқӣ ва соҳибкорони инфиродӣ» ва «Оид ба ворид намудани иловаҳо ба Қонуни Ҷумҳурии Тоҷикистон «Дар бораи дигар пардохтҳои ҳатмӣ ба буҷет»-ро баррасӣ карданд