Вохӯриҳои созанда бо сокинони пойтахт

Душанбе, 06.08.2015. (АМИТ «Ховар», Фарзонаи Давлат).-Кумитаи ҷавонон, варзиш ва сайёҳӣ тибқи Нақшаи чорабиниҳои якҷояи кумитаҳои ҷавонон, варзиш ва сайёҳӣ, кор бо занон ва оила ва мақомоти иҷроияи маҳалии ҳокимияти давлатӣ дар шаҳри Душанбе бо мақсади пешгирии омилҳои номатлуб дар ҷомеа, баланд бардоштани ҳисси ватандӯстӣ, ташаккули худшиносӣ, арҷгузорӣ ба муқаддасоти давлат ва хизмат ба Ватан миёни сокинон ва ҷавонон корҳои фаҳмондадиҳиро ба роҳ монданд. 
Тибқи нақшаи муштарак аз 1 июл то 1 ноябри соли ҷорӣ чорабиниҳо дар маҳаллаҳои ноҳияҳои И.Сомонӣ, Шоҳмансур, Фирдавсӣ ва Синои шаҳри Душанбе бо иштироки бевоситаи роҳбарияти Кумита дар якҷоягӣ бо дигар мақомоти дахлдори давлатӣ бо сокинон ва ҷавонон доир карда мешаванд. 
Наврӯз Қурбонов, Мутахассиси пешбари Бахши таҳлилу иттилооти Кумитаи ҷавонон, варзиш ва сайёҳӣ  чунин хабар дод, ки то имрӯз масъулини Кумита дар маҳаллаҳои Шафақ, Ҳабибулло Назаров, Сурхоб, Аҳрорӣ, Нодира, Заҳматобод, Амиршоев, М.Холов ва Шафтолузори ноҳияи И.Сомонӣ ва маҳаллаҳои 3 ноҳияи дигари пойтахт  вохӯрию мулоқот доир намуданд, ки ин иқдом барои баланд бардоштани маърифати ҳуқуқӣ, арҷгузорӣ ба фарҳангу арзишҳои умумимиллӣ ва эмин нигоҳ доштани ҷавонон аз ақидаҳои бегона таъсири мусбат расонидааст. 
Ба иттилои мавсуф, дирӯз чунин як мулоқоти созанда дар биноҳои баландошёнаи хиёбони Ҳофизи Шерозӣ бо сокинону истиқоматкунандагони маҳалла доир карда шуд, ки дар он муовини Раиси Кумитаи ҷавонон, варзиш ва сайёҳӣ Ҳабибулло Амирбекзода, сардори раёсати ҷавонон, варзиш ва сайёҳии шаҳри Душанбе Аббос Саймуддинов, намояндаи ҳукумати ноҳияи И. Сомонӣ ва раёсати ҳифзи муҳити зисти шаҳри Душанбе иштирок намуданд. 
Масъулин вобаста ба масъалаҳои тозагии гирду атрофи маҳал, пешгирии ҷавонон аз гаравидан ба ҳизбу ҳаракатҳои иртиҷоӣ ва дигар масоили мавриди назар бо сокинон суҳбат намуданд.