Қайроққум: Корхонаи истеҳсоли ноқилҳои барқӣ ифтитоҳ ёфт

Душанбе, 16.09.2015. (АМИТ «Ховар»).- Имрӯз дар шаҳри Қайроққум бо иштироки раиси вилоят Абдураҳмон Қодирӣ корхонаи нави саноатии ҶДММ «Суғдкабел» ифтитоҳ ёфт. Корхонаи мазкур ба истеҳсоли навъҳои гуногуни  ноқилҳои барқӣ машғул хоҳад шуд. Бояд гуфт, ки ин аввалин коргоҳи истеҳсоли ноқили барқӣ дар ҷумҳурӣ аст, ки бо истифода аз миси хушсифат ноқилҳои пуриқтидор истеҳсол мекунад. То ин дам чунин ноқилҳо аз алюминий сохта мешуданд. Ноқилҳои мисин аз ҳар ҷиҳат тобовар ва барои истифода бехатар низ мебошанд.
Дар коргоҳи ноқилсозӣ таҷҳизоти муосири чинӣ насб шудаанд. Ашёи хом — мис ва рӯйпуши ноқилҳоро корхона аз Эрон дастрас мекунад. Дар корхона  12 нафар бо кор таъмин шуда, дар оянда доираи фаъолияти корхона васеъ мегардад ва теъдоди коргарон низ меафзояд.