Артиши Сурия дар наздикии Палмира ҳамлаи силоҳбадастонро зада гардонид

Душанбе, 16.09.15. (АМИТ «Ховар»). — Артиши  Сурия  се  километр  дуртар  аз шаҳри Палмираи Сурия  ҳамлаи  дастаҳои  гурӯҳи  террористии «Давлати  исломӣ» — ро  зада  гардонид. Назар  ба  иттилои РИА Новости,  дар  ҷараёни  муҳориба шаш  нафар  силоҳбадастон  кушта  шуданд. Мавқеъҳои  пешсафи  артиши  Сурия  дар  масофаи аз 4 то  7  километр  дуртар  аз   шаҳри таърихии  Палмира қарор  доранд. Террористон  ҳамарӯза  кӯшиш мекунанд, ки  бо  истифода  аз  гурӯҳҳои  махсус  иборат  аз  12  нафар ба  мавқеъҳои низомиёни  Сурия ҳамла  оранд.
«Мо  тавонистем, ки  ҳамлаи  террористонро  зада гардонем. Камаш  шаш нафар  силоҳбадастон  ва як  танки  душман   нест  карда шуд», —  гуфт  яке  аз  афсари  артиши  Сурия. 
Рӯзи  чорум  аст, ки  амалиёти  ҳарбӣ  дар  16  километрии шаҳри  Палмира  дар  наздикии  конҳои  нафти Ҷазал, аз  як  тарафи шаҳри  бостонӣ ва Тал — Абияд,  аз  тарафи дигар,  идома  дорад. 
Ҷангиёни  ДИ 12  май иборат  аз  2 — 2,5  ҳазор нафар бар  асари  ҳамла  шаҳри  Палмираро  ишғол  намуда буданд. Ифротиён  баъди  истилои  ин  шаҳр   димнаҳои таърихиро  минагузорӣ  намуда,  се  маъбади қадимиро  таркониданд. 
Муҳофизони  шаҳр  сарфи  назар  аз  бартарияти  қувваҳои  душман тайи 8 рӯзи  мудофиа қариб 600  нафар  силоҳбадастонро нобуд  сохтанд. Дар  ҷараёни  муҳориба  85  нафар  ҷанговарони  Сурия ҳалок ва 80  нафари онҳо захмӣ  гардида, 50  нафарашон  бедарак шудаанд.