Баррасии суннати номгузорӣ дар Душанбе

Душанбе, 29.09.2015.(АМИТ «Ховар», Зарина Саидзода).- Дар конфронси ҷумҳуриявӣ, ки таҳти унвони «Номҳои ҷуғрофӣ ва суннати номгузорӣ» имрӯз дар Китобхонаи миллии Тоҷикистон доир гардид, зикр шуд, ки Сарредаксияи Энсиклопедияи миллии тоҷик  таҳти унвони «Феҳристи  номи маҳалҳои Тоҷикистон» китоб ба табъ расонидааст. Зимни омӯзиши китоби мазкур ба назар мерасад, ки зимни масъалаи номгузорӣ  ва иваз намудани номи маҳалҳои аҳолинишини кишвар комиссияҳои номгузорӣ ба шитобкорию саҳлангорӣ роҳ дода, қисме  аз номҳои таърихию ҷуғрофиро  аз байн бурдаанд. Таъкид гардид, ки дар ин самт Ҳукумати мамлакат  ба мақомоти иҷроияи ҳокимияти давлатии шаҳру навоҳии  кишвар, Кумитаи забон ва истилоҳот  ва Академияи илмҳои ҷумҳурӣ  оид ба рафъи ин мушкилот супоришҳои мушаххас додаанд. 
             Мавриди зикр аст,ки ҳамоиш бо ибтикори Кумитаи забон ва истилоҳоти назди Ҳукумати ҷумҳурӣ гузаронида шуда, дар он олимону муҳаққиқони забоншинос, бостоншинос ва таърихшинос дар мавзӯъҳои номгузории ҷуғрофӣ  ва суннатҳою мушкилот  маърӯза намуданд.