Дар Донишкадаи исломии Тоҷикистон мулоқоти рӯҳониёни кишвар баргузор шуд

Душанбе, 18.09.2015. (АМИТ «Ховар»).- Субҳи имрӯз бо ташаббуси Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон дар толори Донишкадаи исломии Тоҷикистон ба номи Имоми Аъзам — Абӯҳанифа бо иштироки раиси  кумита Давлатзода Сулаймон, муовини раиси кумита Ҷумъахон Ғиёсов, раиси Маркази исломии Тоҷикистон Саидмукаррам Абдуқодирзода ва ректори Донишкадаи исломии Тоҷикистон Асомуддинзода Тоҷиддин бо сархатибон, эмом-хатибон ва мудирони бахшҳои дини шаҳру ноҳияҳои тобеи ҷумҳурӣ мулоқот баргузор гардид. Дар рафти мулоқот ҳодисаҳои хунине, ки бо айби як гурӯҳ хоинони Ватан сар зада, боиси марги одамон гашт мавриди муҳокима қарор гирифт. Муовини раиси кумита Ҷумъахон Ғиёсов дар баромади худ қайд кард, ки як гурӯҳ одамон зери ниқоби дини ислом даст ба ҷинояткориҳо зада, кӯшиш мекунанд, ки сулҳу суботи Тоҷикистонро халалдор кунанд. Мавқеи бетарафӣ, ки ҲНИТ вобаста ба ин ҳодисаҳо ишғол намуд, аз он шаҳодат медиҳад, ки роҳбарону аъзои ҳизби наҳзат ҷонибдори гурӯҳи террористон мебошанд.
Қарор қабул карда шуд, ки нуқтаҳои муҳими мулоқоти баргузоршуда, дар хутбаи имрӯзаи намози ҷумъа ба самъи намозгузорон расонида шавад.