Дастури Убайдуллоев ба Лангариева :«вазъи ҷойҳои ҷамъиятиро дақиқ намоед!»

Душанбе, 01.09.2015.(АМИТ «Ховар», Марзия Саидзода).-Интизор меравад, ки шаҳрдории Душанбе бархе аз ҷойҳои ҷамъиятиро ба марказҳои дӯзандагӣ ва дигар ҳунарҳои истеҳсолии мардумӣ табдил дода, дар ин росто бонувони хонашини Душанберо, бо ҷои кор таъмин созад. Дар иртибот  Маҳмадсаид Убайдуллоев-раиси шаҳри Душанбе дар ҷаласаи корӣ ба муовини соҳавияш Ҷамила Лангариева дастур дод, ки ҳамроҳ бо масъулони сохторҳои марбута ҳолати ҷойҳои ҷамъиятие, ки дар маҳаллаю шаҳракҳои пойтахт воқеанд, дар зарфи як ҳафта дақиқ намояд. Ва аз натиҷаи онҳо ба шаҳрдорӣ дар доираи санадҳои меъёрию ҳуқуқӣ маълумот ироа созад. Ин иқдоми шаҳрдорӣ дар ҳолест, ки ҳафтае қабл дар пойтахт 45 гурӯҳи кории таблиғотӣ созмон дода шуд, ки ҳадафи он мубориза бо фарҳанги ғайр ва дигар зуҳуроти номатлуб, бахусус ифротгароист.