Идомаи ҷустуҷӯи Карим Девона

Душанбе, 08.09.2015 (АМИТ “Ховар” Ҳотами Шариф).-Китоби нави мудири шӯъбаи рушди иҷтимоӣ ва робита бо ҷомеаи дастгоҳи раиси ноҳияи Рӯдакӣ Муҳаммадии Салим бо номи «Қиссаи Карим Девона» дастраси хонандагон гардид. Муаллиф бо овардани мисолҳои аниқу мушаххаси таърихӣ тавонистааст,  рӯзгори шоири халқ — Абдукарими Қурбон (Карим Девона)-ро, ки барои беҳбудии рӯзгори мардум бо шеър мубориза бурдааст, тасвир намояд.
    Дар ашъори шӯрангези шоири халқ- Карим Девона, ки баҳри тантанаи ҳақиқату адолат, бародарию баробарӣ ва дӯстиву рафоқат дар талош буд, зиндагии фоҷиабори сокинони водии Ҳисор  дар охири асри XIX ва аввали асри XX образноку хотирмон инъикос ёфтааст. Ҳикояҳои ҷолиб, шеърҳои худи Карим Девона китобро хеле хонданбоб намудаанд. Муҳарририи китобро Муҳаммадраҳим Юсуфӣ ба ӯҳда доштааст.