Муроҷиатномаи 3 ҳазор тоҷикони Москва ба мардуми Тоҷикистон

Душанбе, 21.09.2015. (АМИТ «Ховар»). — Мо 3 ҳазор нафар тоҷикон, ки дар Маркази савдои «Москва» кору зиндагӣ дорем, амалҳои хоинона ва разилонаи собиқ муовини вазири мудофиаи  Тоҷикистон ва ҳаммаслакони инро маҳкум намуда, хоҳони субот ва шукуфоии сартосарӣ дар кишвари азизамон-Тоҷикистон ҳастем. Мо, ки аз ин ҳодисаҳои нангини душманони миллати тоҷик тариқи васоити ахбори умум огоҳ шудем, хостори он ҳастем, ки ҷинояткорон мутобиқ ба қонун ба ҷавобгарӣ кашида шаванд.
Вазъи кунунии ҷаҳон ҳамаи моро водор месозад, ки ваҳдати миллӣ, соҳибистиқлолӣ ва суботу оромии кишварро чун гавҳараки чашм нигоҳ дошта, ба қадри ин неъматҳои бебаҳо бирасем. 
Имрӯз, ки ҳар гуна ҳизбу ҳаракатҳои ифротӣ миёни сокинон, бахусус ҷавонон бо ғояҳои ифротӣ мардумро аз роҳ бероҳ кардан доранд, зарур аст, ки ҷавонони бонангу номуси тоҷик фирефтаи бофтаҳои эшон набошанду ба хотири ваъдаҳои бардурӯғ ва ғаразноки онҳо ба сари модару хоҳар ва падару бародари худ ҳодисаҳои нангин наоранд. 
Тавре аз изҳороти расмии Прокуратураи генералии Ҷумҳурии Тоҷикистон бар меояд, аксари ҳаммаслакони гурӯҳи террористии ҳоҷӣ Ҳалим аъзои фаъоли Ҳизби наҳзати исломии Тоҷикистгон мебошанд. Тавре маълум аст, саркардагони  нооромиҳои солҳои 90 низ аъзои ҳамин ҳизб буданд, ки миллати тоҷик оқибати вазнину сангини онро дид. Ин миллат, хиёнати ин нобакоронро ҳаргиз фаромӯш нахоҳад кард. Аз ин рӯ, қатъ кардани фаъолияти ҲНИТ аз тарафи мақомоти қудратии кишвар саривақтӣ  аст, зеро аъзои гумроҳу хиёнаткори ин ҳизб метавонанд дар оянда боиси ноооромӣ дар кишвари азизи мо гарданд.  
Бо назардошти ин, мо изҳороти расмии Прокуратураи генералии Ҷумҳурии Тоҷикистон дар бораи оғоз шудани парвандаҳои ҷиноятӣ нисбат ба роҳбарону саркардагон ва аъзои гурӯҳи ғайриқонунии ҳоҷӣ Ҳалимро ҳамаҷониба дастгирӣ менамоем. 
Боварии комил дорем, ки мардуми тоҷик, бахусус ҷавонони кишвар иқдомҳои созанда ва ғамхориҳои падаронаи Сарвари давлати Тоҷикистон Эмомалӣ Раҳмонро қадр карда, пуштибони сиёсати пешгирифтаи давлату Ҳукуматанд. 
Мо тоҷикони Маркази савдои «Москва» низ сиёсати давлат ва Пешвои миллатамонро ҳамаҷониба пуштибонӣ намуда, дар якҷоягӣ бо ҳамватанони бурунмарзӣ  ин ҳама кору  амали  ношоистаи гурӯҳҳои ҷиноятпешаро маҳкум менамоем ва аз мардуми хирадманди Тоҷикистон хоҳишмандем, ки барои несту нобуд сохтани амалҳои душманони миллати тоҷик якдилона мубориза баранд.

Тоштемиров Муҳаммад Рустамович,
Норов Шоҳин Абдулаевич,
Каримов Нурулло Абдулоевич,
Шоматов Иброим Абдураҳмонович,
Ярашов Уктамҷон Нуралиевич,
Сафаров Насим Олимович,
Рашидзода Саидҷон
Мараимов Сино Додоевич
Ҷамъ 3 ҳазор нафар тоҷикони ш. Москва
22.09.2015.