Н.Назарбоев: Байни Тоҷикистону Қазоқистон масоили баҳсӣ вуҷуд надоранд

Душанбе, 14.09.2015. (АМИТ «Ховар», Лайло Тоирӣ).-  Байни Тоҷикистону Қазоқистон  ягон масъалаи баҳсӣ ва ё нофаҳмӣ дар ягон соҳа вуҷуд надорад, баръакс байни мо ҳусни тафоҳум  мавҷуд мебошад, -гуфт Президенти Ҷумҳурии Қазоқистон Нурсултон Назарбоев  имрӯз, 14 сентябр зимни изҳороташ барои матбуот оид ба натиҷаҳои музокироти сатҳи олии Тоҷикистону Қазоқистон. 
«Тоҷикистон дар мушкилоти обию энергетикӣ дар минтақа ҷои муҳимро ишғол мекунад ва мо, кишварҳои Осиёи Марказӣ бояд дар ин масъала  созиш намоем, на ҷанҷол.   Мо бояд ҳамкориямонро  ба муддати дароз ба роҳ монем.  Махсусияти Тоҷикистон дар он аст, ки дар ин кишвар соҳаи кишоварзӣ хуб ба роҳ монда шудааст ва меваю сабзавоти Тоҷикистон ба мо,  ба Қазоқистони Шимолӣ ва Федератсияи Русия  заруранд. Аз ҳамин сабаб рушди ин соҳаро бояд боз ҳам хубтар  ба роҳ монд»,-таъкид кард Президенти Қазоқистон.  
Хотиррасон мекунем, ки имрӯз зимни сафари расмии Президенти Қазоқистон Нурсултон Назарбоев ба Тоҷикистон дар радифи як зумра ҳуҷҷатҳо- «Созишнома дар бораи ҳамкории стратегӣ байни Ҷумҳурии Тоҷикистон ва Ҷумҳурии Қазоқистон» ва «Барномаи ҳамкорӣ байни ВКХ ҶТ ва ВКХ ҶҚ» ба имзо расиданд.