Намояндагони доираҳои тиҷоратии Тайван ба Душанбе меоянд

   Душанбе, 14.09.2015.(АМИТ «Ховар», Марзия Саидзода).- Бо мақсади таҳкими ҳамкории иқтисодию тиҷоратии Тоҷикистону Тайван аз 14 то 16 октябри соли равон дар Душанбе ҳамоиши доираҳои тиҷоратии Тоҷикистону Тайван баргузор мегардад. Ин чорабинии иқтисодӣ бо ибтикори Палатаи савдо ва саноати Тоҷикистон ва намояндагии Маркази савдои Тайван дар Алмаато  гузаронида мешавад. Дар иртибот ба ин намояндаи доираҳои тиҷоратии Тайван таҳти роҳбарии Сун Тсин Чуан -роҳбари намояндагии Маркази савдои Тайван дар Қазоқистон моҳи октябр ба Душанбе  ташриф меорад. 
           Назар ба иттилои Мукаммал Раҷабӣ -сухангӯи Палатаи савдо ва саноати кишвар ба ҳайати доираҳои тиҷоратии Тайван роҳбарону намояндагони ширкатҳои Тайван, назири- «Tongtai Machine & Tool Co., Ltd», «PSS GLOBAL TRADING CO.,LTD», «FU CHUN SHIN MACHINERY MANUFACTORY CO., LTD», «HPB TECHNOLOGY CO. LTD», «Ching Yuang Enterprise Co.,Ltd», «VOLTRONIC POWER TECHNOLOGY CORPORATION», «EASYWELL WATER SYSTEMS, INC» шомиланд. Интизор меравад, ки дар ҳамоиш масъалаҳои таҳкими ҳамкории иқтисодию тиҷоратии Тоҷикистону Тайван, ҷалби сармояи Тайван ба иқтисоди Тоҷикистон,  ба роҳ мондани ҳамкорӣ бо ширкатҳои пешрафтаи Тайван баррасӣ шаванд.