Натиҷагирӣ аз фаъолияти гурӯҳҳои таблиғотӣ

     Душанбе, 22.09.2015.(АМИТ “Ховар”, Марзия Саидзода).- Шаҳрдори Душанбе Маҳмадсаид Убайдуллоев аз  аҳли ҷамоати пойтахт ва дигар мақомоти марбута тақозо намуд, ки нисбат ба дилхоҳ ашхоси барангезандаи андешаи нифоқу рахнаовари ҳамзистии осоишта ва субот, ки бар асари ҷоннисориҳо ба даст омадааст, бетарафӣ зоҳир накарда, ҳамкориро тақвият бахшанд. Ин матлабро раиси шаҳр дар ҷаласаи шаҳрдорӣ зимни натиҷагирӣ ва таҳлил аз фаъолияти 45 гурӯҳи таблиғотӣ, ки аз охири моҳи август инҷониб бо сокинони шаҳраку маҳаллаҳои  пойтахт вохӯрӣ анҷом медиҳанд, зикр кард. Раиси шаҳр роҳбарону аъзои гурӯҳҳои таблиғотиро муваззаф намуд, ки барои баланд бардоштани маърифат ва донишҳои ҳуқуқии сокинон дар самти пешгирии таъсиррасонии фарҳанги ғайр ва дигар ақидаҳои иртиҷоӣ мулоқотро ба таври мақсаднок ба роҳ монанд. Зикр шуд, ки яке аз омилҳои гаравидани баъзе аз қишрҳои ҷомеа, хусусан ҷавонон  ба ҳаракатҳои иртиҷоӣ надоштани донишҳои динию дунявӣ вабетарафии ҷомеаю волидайн аст. Таъкид гардид, ки бархе аз ҷавонон ба ваъдаҳои безаминаи мубаллиғони тамоюлҳои тундрав бовар намуда, гумоштагони бетақдир ва қурбонии бозиҳои тарҳрезишудаи геополитикию ноамниҳо мегарданд.