Нелегал-2015 дар вилояти Суғд оғоз гардид

Душанбе, 28.09.2015.(АМИТ «Ховар»).- 21-25 сентябр дар доираи амалиёти махсуси Нелегал-2015 дар вилояти Суғд 3 ҳолати ҳуқуқвайронкунии маъмурӣ аз ҷониби шаҳрвандони хориҷӣ ошкор  шуд.  Дар ин бора аз Хадамоти матбуоти раиси вилояти Суғд хабар доданд.
Ёдовар мешавем, ки дар вилоят марҳилаи дуюми амалиёти муштараки махсуси Нелегал-2015 муташаккилона оғоз ёфта, то 9 октябр давом меёбад. Мақсади амалиёти махсус ошкорсозии роҳҳои муҳоҷирати ғайриқонунӣ, ташкилотчиёни он, мубориза бар зидди хариду фурӯши одамон, пурзӯр намудани муқовимат алайҳи будубоши ғайриқонунии шаҳрвандони хориҷӣ ва шахсони бешаҳрвандӣ, ҳамзамон ғайриқонунӣ ба фаъолияти меҳнатӣ машғул шудани онҳо дар ҳудуди ҷумҳурӣ мебошад.
Дар ин амалиёт дар радифи Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилояти Суғд гурӯҳҳои санҷишии Раёсати Вазорати корҳои дохилии Ҷумҳурии Тоҷикистон ва Раёсати Кумитаи давлатии амнияти миллии Ҷумҳурии Тоҷикистон дар вилоят ҳам иштирок доранд.