Оғози сохтмони Шуъбаи Вазорати корҳои дохилӣ дар шаҳри Ваҳдат

Душанбе, 06.09.2015. (АМИТ «Ховар»). — Дар шаҳри Ваҳдат Сарвари давлат Эмомалӣ Раҳмон бо гузоштани санги асос ба сохтмони бинои Шуъбаи Вазорати корҳои дохилӣ дар шаҳри Ваҳдат оғоз бахшид.

Бино аз се ошёна ва таҳхона иборат буда, бо харҷи 30 миллион сомонӣ аз ҷониби пудратчӣ Корхонаи давлатии сохтмонии рақами 2 — и Вазорати корҳои дохилии ҷумҳурӣ сохта мешавад.

Иншооти мазкур дар кӯчаи Исмоили Сомонии шаҳр бунёд шуда, ба ғайр аз бинои асосӣ дар ҳудуди иншоот нуқтаи гузаргоҳ, таваққуфгоҳ барои мошинҳои кормандон, майдончаи варзишӣ пешбинӣ шудааст.

Дар таҳхонаи ин бино ошхона барои 55 нафар бо ошпазхона, толори варзиши бадан, ҳаммом, анборхона ва дигар утоқҳои зарурӣ бунёд мешавад.

Сарвари давлат Эмомалӣ Раҳмон ба сохтмончиён барои иҷрои корҳои босифат бодарназардошти тамоми меъёрҳо ва шароити корӣ дастуру ҳидоятҳо дод.