Олимони ҷавон ба ҳам омаданд

Душанбе, 07.09.2015. (АМИТ «Ховар»). — Имрӯз бо ибтикори Кумитаи ҷавонон, варзиш ва сайёҳӣ бахшида ба 24-солагии Истиқлолияти давлатии Ҷумҳурии Тоҷикистон дар Донишгоҳи технологии Тоҷикистон Конференсияи ҷумҳуриявии илмию амалӣ таҳти унвони «Нақши созандаи ҷавонон дар раванди ҷаҳонишавӣ ва таҳкими  Истиқлолияти комил» бо иштироки 80 нафар олимону муҳаққиқони ҷавони ҷумҳурӣ  баргузор гардид.
Дар конфронс Аҳтам Абдуллозода, раиси Кумитаи ҷавонон, варзиш ва сайёҳӣ, намояндагони Дастгоҳи иҷроияи Президент, Вазорати маориф ва илм, Академияи илмҳо ширкат варзида, роҷеъ ба дастовардҳои олимони ҷавон дар даврони соҳибистиқлолӣ ибрози андеша намуданд. 

Гуфта шуд, ки имрӯзҳо теъдоди зиёди ҷавонон дар пайи навиштани рисолаҳои илмӣ, таҳқиқотҳои илмӣ, ба майдони илму маърифат овардани китобҳои беназир барои насли имрӯзу фардои сарзамини маҳбубамон нақши бағоят арзанда доранд. 
Ҳамзамон таъкид гардид, ки бештари ҷавононе, ки ба вазифаҳои пурмасъул таъин мегарданд, номзади илм, дотсент, доктор ва профессор мебошанд. Ин далолат аз он мекунад, ки ҷавонон ба хотири пешрафти илму маърифати кишвар кӯшишҳои беназир карда истодаанд, то ки ҷомеаи мо соҳиби илму маърифати ҷаҳонӣ гардад.

Масъулин изҳор намуданд, ки  баргузории чунин конфронсҳо ба тақвияти ҳисси ватандӯстии ҷавонон мусоидат намуда, дар ин радиф сафи олимони ҷавон афзоиш меёбад. 
Лозим ба ёдоварист, ки ҳамасола аз ҷониби Кумитаи ҷавонон, варзиш ва сайёҳӣ барои тақвият бахшидани нерӯи зеҳнӣ ва ҷалби олимону муҳаққиқони ҷавон ба корҳои илмӣ тадқиқотӣ конференсияҳои илмӣ-амалӣ, доир карда мешаванд.