Семинари омӯзишӣ: «Нақши хадамоти дипломатӣ ва консулгариҳо дар муқовимат ба савдои одамон»

Душанбе, 28.09.2015 (АМИТ «Ховар»).- Имрӯз, 28 сентябри соли 2015 семинар-тренинги дурӯзаи омӯзишӣ «Нақши хадамоти дипломатӣ ва консулгариҳо дар муқовимат ба савдои одамон», ки бо мақсади баланд бардоштани сатҳи дониши 20 роҳбар-корманди консулгариҳо ва сафоратҳои Ҷумҳурии Тоҷикистон дар хориҷи кишвар дар муқовимат ба савдои одамон таҳия гардидааст, дар Душанбе оғоз ёфт.
Ҳадафи тренинг — кумак ба Вазорати корҳои хориҷӣ, сафоратҳо ва консулгариҳои Тоҷикистон дар хориҷа барои коркард ва иҷро намудани чораҳои зарурӣ оид ба муқовимат ба савдои одамон ва ҳимояи қурбониёни савдои одамон дар хориҷи кишвар аст, ки дар хориҷа эҳтимоли ҳодисаҳои савдои одамон зиёдтар мегардад. Ҳамчунин иштирокчиён бо нақши механизми миллии бозравонии қурбониёни савдои одамон барои кумак ба созмонҳои дахлдори ҳукумативу шаҳрвандӣ шиносоӣ пайдо менамоянд.
Семинар аз ҷониби Созмони Байналмилалии Муҳоҷират (СБМ) дар ҳамкорӣ бо Вазорати корҳои хориҷии Ҷумҳурии Тоҷикистон,  Комиссияи байниидоравии мубориза ба муқобили савдои одамони назди Ҳукумати Ҷумҳурии Тоҷикистон ва Маркази миллии таълимӣ оид ба муқовимат ба савдои одамони назди Донишгоҳи миллии Тоҷикистон бо маблағгузории Департаменти давлатии Иёлоти Муттаҳидаи Амрико/шуъбаи давлатӣ оид ба мониторинг ва муқовимат ба савдои одамон (J/ TIP) ташкил шудааст.   
Савдои одамон барои инсоният хатарнок буда, дар мубориза бар зидди он нақши сафоратҳо, консулгариҳо ва хадамоти муҳоҷирати бурунмарзӣ махсусан муҳим аст, зеро онҳо дар кишварҳои мизбон нуқтаи нахустини тамос байни мамлакат ва қурбониёни савдои одамон мебошанд.  
Иштирокдорони семинар вазъи савдои одамонро дар Тоҷикистон, аз ҷумла қонунгузории навини миллӣ ва воситаҳои байналмилалиро муҳокима карда, бо таҷрибаи байналмилалии Ҷумҳурии Тоҷикистон дар самти муқовимат ба савдои одамон шинос шуданд.