Супоридани хонаҳои нав ба аҳолии аз офати табиӣ зарардидаи Бадахшон

Душанбе, 19.09.2015. (АМИТ «Ховар»). — Бо иштироки муовини Сарвазири мамлакат Азим Иброҳим, раиси вилояти Бадахшон Шодихони Ҷамшед, раиси ноҳияи Ишкошим Зикрхудо Самадов калиди хонаҳои навбунёд, ки бо супориши Президенти мамлакат Эмомалӣ Раҳмон барои аҳолии аз офати табиӣ зарардида бунёд гардиданд, ба соҳибонаш супорида шуд. Аз ҷумла, ба Азизмаҳмад Маликшоев, ки солиёни зиёд дар Вазорати адлия кор карда, зимни адои хизмат маъюби дараҷаи якум гардид, хонаи нав дода шуд. Азизмаҳмад Маликшоев соҳиби як фарзанд мебошад ва дар айни замон тибқи супориши Президенти мамлакат Эмомалӣ Раҳмон дар яке аз беморхонаҳои пойтахт-шаҳри Душанбе табобат мегирад. Калиди хона ба модари Азизмаҳмад-  Резагул Гулдасташоева супорида шуд. Бояд гуфт, ки тибқи супориши Президенти мамлакат ҷиҳози хонаи ин оила аз ҷониби Муассисаи давлатии «Телевизиони Сафина» ва Академияи Вазорати корҳои дохилӣ таъмин гардид. Хотиррасон бояд кард, ки ин хонаи истиқоматӣ чун дигар хонаҳои аз офати табиӣ зарардидаи минтақаи Бадахшон пеш аз муҳлат сохта шуд.