Таваҷҷуҳ ба рушди ҳунарҳои мардумӣ

Душанбе, 17.09.2015. (АМИТ «Ховар»).- Дирӯз дар шаҳраки Сирдарёи шаҳри Қайроққум бо иштироки раиси вилояти Суғд Абдураҳмон Қодирӣ маркази таълимию истеҳсолии ҳунарҳои анъанавӣ мавриди истифода қарор гирифт.
Марказ дар ошёнаи дуюми бинои маъмурии ҷамоати шаҳрак созмон ёфта, дар он 5 устои ҳунарманд ба 20 шогирд атласу адрасбофиро меомӯзанд. Дар бахши дӯзандагӣ 4 нафар ба шуғл фаро гирифта шуда, 5 шогирд ҳунари қолинбофиро аз худ мекунад. Ба маркази таълимию истеҳсолӣ 4 дастгоҳи матоъбофӣ аз ҷониби мақомоти иҷроияи ҳокимияти давлатии вилоят, чор дастгоҳи қолинбофӣ ва чор мошини дӯзандагӣ аз тарафи Кумитаи имдоди имом Хумайнӣ дастрас гардид.
Раиси вилоят аз бунёди маркази таълимию истеҳсолӣ изҳори қаноатмандӣ намуд ва афзуд, ки бо ифтитоҳи чунин коргоҳҳои ҳунаромӯзӣ беш аз 1000 зани хонашини шаҳраки Сирдарё, ки се ҳазор нафар аҳолӣ дорад, дар оянда бо касбу маоши арзанда таъмин хоҳанд шуд, зеро бо дастгоҳҳои матоъбофие, ки пас аз гирифтани сертификат ба бонувон тақдим мешаванд, на танҳо атласу адрас, балки навъҳои дигари матоъ, аз қабили карбос, шоҳӣ, чит ва алочаро метавон истеҳсол кард. Абдураҳмон Қодирӣ ҳамзамон тавсия дод, ки дар бахши гилембофӣ ҳунармандони марказ асосан ба истеҳсоли таблофаршҳо такя кунанд, чунки ин навъи қолинчаҳо имрӯз хеле серхаридор мебошанд ва фурӯши онҳо низ осонтар аст.
 Тавре ки ба АМИТ «Ховар» аз Хадамоти матбуоти вилояти Суғд иттилоъ доданд,  ҳоло дар вилоят 76 маркази таълимию истеҳсолӣ ташкил гардида, бо 263 дастгоҳи атласу адрасбофӣ таъмин шудаанд.