Барномаи идомаи соли роҳҳои обод 107% иҷро шуд

Душанбе, 01.10.2015 (АМИТ «Ховар»).- Барномаи вилоятии «Соли 2015 — идомаи соли роҳҳои обод», ки бо мақсади таъмиру навсозӣ ва беҳтар намудани ҳолати роҳҳои ҳудуди вилоят қабул шудааст, 107,2 фоиз иҷро гардид. Тибқи маълумоти фаврии Шуъбаи нақлиёт ва коммуникатсияи дастгоҳи раиси вилояти Суғд соли равон дар шаҳру ноҳияҳои вилоят 117 км роҳ пурра мумфарш, 1337 км таъмири ҷорӣ ва 1890 км шағалпӯш шудааст.
Ба иттилои масъулин дар доираи Барномаи вилоятии «Соли 2015 — идомаи соли роҳҳои обод» соли равон дар маҷмӯъ ҳолати 3344 км роҳ беҳтар гардидааст.
Хотирнишон бояд кард, ки бо ибтикори раиси вилоят Абдураҳмон Қодирӣ соли 2014 дар вилоят «Соли роҳҳои обод» эълон гардид. Дар соли сипаришуда беш аз 2800 км роҳҳои ҳудуди вилоят ба таъмиру навсозӣ фаро гирифта шуданд.