Бонки ҷаҳонӣ ташкили озмоишгоҳи муосирро маблағғузорӣ карданист

Душанбе, 28.10.15. (АМИТ «Ховар»). — Дар  шаҳри  Душанбе  мулоқоти  роҳбари Сарраёсати  геологияи  Тоҷикистон  Мурод Хол бо  намояндагони  Бонки  ҷаҳонӣ, ки  вазифаҳояшон иборат  аз  назорати иҷрои  лоиҳаи «Иртиқои  рақобатпазирии  бахши  инфиродӣ» ва баррасии  масоили  марбут ба  саноати  маъдан  аст,  баргузор гардид. 
Тавре  ки  дафтари  матбуоти Сарраёсати  геология   хабар  медиҳад, ҷонибҳо  масоили   марбут ба  қабули таҳрири  нави  қонун «Дар  бораи қаъри  замин»,  фаъолияти  ширкати GAFAC — и  Олмон барои таҳияи маълумотнома  дар  бораи  маъдан  ва  истифодаи  маблағҳои Бонки  ҷаҳонӣ барои  ширкати  мазкур,  ҳамчунин масъалаҳои марбут ба   лоиҳаи  «Иртиқои  рақобатпазирии   бахши  инфиродӣ» — ро мавриди  муҳокима  қарор  доданд.
Сардори  Сарраёсати  геология пешниҳод  намуд, ки Бонки  ҷаҳонӣ  барои  ташкили озмоишгоҳи  муосири  дорои  технологияҳои нав  маблағ ҷудо  намуда, барои тарбияи  кормандони озмоишгоҳ  мутахассисони моҳирро  даъват  кунад. 
Намояндагони  Бонки  ҷаҳонӣ  ин  пешниҳодро  пазируфта, изҳор  доштанд, ки  барои  амалӣ  шудани он  саъй  мекунанд.