Бунёди синфхонаҳои иловагӣ дар Панҷакенту Конибодом

Душанбе, 15.10.2015. (АМИТ «Ховар»).-Дар вилояти Суғд бо истифода аз ҳамаи сарчашмаҳо бунёд ва таъмири силсилаи иншооти соҳаи маориф ба нақша гирифта шудааст, ки то имрўз 26 иншоот мавриди истифода қарор гирифта, корҳои сохтмонӣ дар дигар иншооти соҳа идома доранд.
  Дар деҳаи Метки ҷамоати деҳоти Ваҳдати ноҳияи Ғончӣ бо иқдоми марди саховатпешаи 75- сола Ҳоҷимаҳкам Ёқубов сохтмони бинои мактаби замонавӣ иборат аз 13 синфхона, дар ноҳияи Ҷ. Расулов сохтмони бинои иловагӣ дар назди мактаби №19, дар шаҳри Хуҷанд таъмиру навсозии кўдакистони №15 ба итмом расонида шуда,  мавриди истифода қарор дода шуданд. 
  Инчунин  дар ноҳияи Б. Ғафуров дар назди мактаби №49 сохтмони бинои мактаб-парваришгоҳ барои кўдакони ятим, дар шаҳри Конибодом  сохтмони 8 синфхонаи иловагӣ дар назди мактаби №6, дар шаҳри Панҷакент сохтмони 10 синфхонаи иловагӣ дар назди мактаби №74 босуръат идома доранд.