Дар Нангарҳор чор қумондони «Давлати исломӣ» таслим шуд

Душанбе, 28.10.15. (АМИТ «Ховар»). — Чанде  пеш  дар  бораи  дар  вилояти   Нангарҳори  Афғонистон ба  ҳукуматдорон ихтиёрона  таслим  шудани  чор нафар  қумондонҳои гурӯҳи ифротталаби «Давлати  исломӣ» хабар  дода шуд. 
Силоҳбадастон  баъди   гуфтушунид бо кормандони Раёсати амнияти  миллӣ  дар  бораи  ихтиёран  таслим  шуданашон  хабар  доданд. Қумондонҳои   таслимшуда  иқрор  шуданд, ки  қабл  аз  гузаштан  ба тарафи «Давлати  исломӣ»  узви ҷунбиши  «Толибон»  буданд, хабар  медиҳад  Агентии  иттилоотии  «Пажвок».
Роҳбари  шуъбаи  музофотии Раёсати  амнияти  миллӣ  генерал Додмуҳаммад Ҳарифӣ таслимшавии  қумондонҳоро ҳамчун   далели  нав  дар  бораи   шикасти   гурӯҳи   ифротиён  дар  вилоят  маънидод  карда,  итминон  дод, ки  тайи  як  моҳ   таъсири «Давлати  исломӣ»  дар  Нангарҳор  пурра аз байн  бурда  мешавад.