Дар вилояти Суғд 61,2 ҳазор хоҷагии деҳқонии оилавию инфиродӣ таъсис ёфтааст

Душанбе, 12.09.2015. (АМИТ «Ховар»).- Дар вилояти Суғд ислоҳоти соҳаи кишоварзӣ идома дошта, танҳо дар соли равон 483 хоҷагии калонҳаҷм таҳти таҷдид қарор дода шуданд. Дар натиҷа теъдоди хоҷагиҳои деҳқонии оилавию инфиродӣ ба 61,2 ҳазор адад баробар шуд. 
Барои таъмини дастрасии хоҷагиҳои деҳқонии вилоят ба захираҳои моддию техникӣ  62 мағозаи фурўши тухмиҳо, 95 адад  қисмҳои эҳтиётӣ ва 71 нуқтаи фурӯши нуриҳои минералӣ фаъолият мебаранд. Ҳамзамон дар вилоят  114 нуқтаи маслиҳатдиҳӣ ташкил ва ба роҳ монда шудаанд, ки ба деҳқонон барои пешбурди кор маслиҳатҳои муфид медиҳанд.
Дар самти ислоҳоти соҳаи обрасонӣ низ тадбирҳо амалӣ шуда, дар вилоят 236 ассотсиатсияи истифодабарандагони об фаъолият мебаранд, ки барои обёрии 193,6 ҳазор гектар замин хизматрасонӣ менамоянд.   
 Дар ин бора аз Хадамоти матбуоти раиси вилояти Суғд хабар доданд.