Фоҳишагарӣ дар яке аз меҳмонхонаҳои пойтахт

Душанбе, 21.10. 2015 (АМИТ «Ховар»). — Тибқи иттилои Вазорати корҳои дохилии мамлакат корманди яке аз меҳмонхонаҳои пойтахт, сокини 39-солаи ноҳияи Файзобод ҳангоми иҷрои вазифаи хизматӣ ба ташкили фоҳишахона машғул будааст. Кормандони ВКД муайян кардаанд, ки номбурда шаби 19-уми октябри соли равон ҳуҷраҳои яке  аз меҳмонхонаҳои шаҳри Душанберо ба фоҳишахона табдил дода, ба шаҳрвандон: марди 23-сола ва зани 18-солаи сокинони ноҳияи Ҳамадонӣ, марди 19-солаи сокини ноҳияи Панҷакент ва зани 20-солаи сокини ноҳияи Ёвон, марди 23-солаи сокини шаҳри Душанбе ва зани 19-солаи сокини шаҳри Чкалов, инчунин марди 35-солаи сокини ноҳияи Дарвоз ва зани 29-солаи сокини ноҳияи Рӯдакӣ барои алоқаи ҷинсӣ намудан шароит фароҳам оварда, аз онҳо 750 сомонӣ гирифтааст. 
Шахси гумонбар дастгир шуда, нисбат ба далелҳои мазкур парвандаи ҷиноятӣ боз шудааст. Тафтиши ин ҳодиса идома дорад.