Гурӯҳи ДИ масъулияти амалиёти террористиро ба дӯши худ гирифт

Душанбе, 06.10.15. (АМИТ «Ховар»).  Гурӯҳи  террористии «Давлати исломӣ» масъулияти таркиши бомба  дар ҷануби Ироқро, ки бар  асари он  10  нафар  ҳалок  гардид, ба дӯши  худ  гирифт. Дар  ин  бора Агентии France Presse хабар  медиҳад. 
Дар  изҳороти  ифротиён  гуфта  мешавад, ки  мақсад  аз амалиёти террористӣ нест кардани  мусулмонони шиапараст  аст, ки аксарияти  аҳолии ҷануби  Ироқро ташкил  медиҳанд. «Давлати  исломӣ» асосан иборат  аз мусулмонони пайрави мазҳаби  суннат  мебошад.
Автомобили  дорои моддаи  тарканда дар  шаҳри Аз  Зубайри назди   шаҳри  Басраи Ироқ тарконида шуд.  Тавре  ки сардори  раёсати амнияти  музофоти  Басра Ҷаббор ас  Саъдӣ хабар  дод, бар  асари  таркиш 10  нафар  ҳалок  гардид. 
Худи  ҳамон  рӯз  дар минтақаҳои  дигари  кишвар  боз ду  амалиёти террористӣ  сурат  гирифт. Дар  шаҳри Ҳалиси  музофоти Диёл бар  асари таркиши  автомобил камаш  35  нафар ҳалок гардида, 40  нафар  захмӣ  шуд. Дар ноҳияи  Ал  Ҳусайнияи пойтахти  Ироқ  шаҳри  Бағдод  бар  асари таркиши  автомобил  камаш  12  нафар низ ҳалок гардид.