Испаниё рисолаташро дар Афғонистон анҷом дод

Душанбе, 26.10.15. (АМИТ «Ховар»). — Испаниё  рисолати  14 — солаашро  дар  Афғонистон анҷом дода, вале 25  нафар  хидматчиёни ҳарбии он  дар  шаҳри  Кобул  боқӣ  мемонанд.
Дар  робита бо  ин дар  вилояти Ҳироти Афғонистон  маросими фуровардани парчами  давлатӣ  баргузор гардид,  ки дар  он   ноиби  раиси  ҳукумати  Испаниё  Сорайя Саэнс де  Сантамария, роҳбари Ситоди  генералӣ  адмирал  Фернандо  Гарсия Санчес  ва  фармондеҳи  артиш  генерал  Ҳайме  Домингес Буҳ  ширкат  доштанд,  хабар  медиҳад  шабакаи телевизионии  «Тулӯъ».
Ёдовар  мешавем, ки Испаниё  моҳи   январи  соли  2002 қӯшунҳояшро вориди Афғонистон  карда  буд.  Тайи  солҳои  рисолат  қариб 30  ҳазор нафар  хидматчиёни  ҳарбии  Испаниё  ворид  Афғонистон шуда,  беш  аз  100  нафарашон  ҳалок  гардиданд. Арзиши умумии рисолат  барои ҳукумати  Испаниё  3  миллиарду  700 миллион  евроро ташкил дод.