Корҳои мустаҳкамкунии соҳилҳо дар Ховалинг оғоз ёфтанд

Кӯлоб, 01.10.2015. (АМИТ «Ховар», Сулаймон Холов).- Сокинони деҳоти ноҳияи Ховалинг, ки дар соҳили дарёчаҳо истиқомат мекунанд, дар давоми солҳои охир аз ҳисоби омадани сел ба мушкилӣ мувоҷеҳ гардидаанд. Ба хотири пешгирии офатҳои табиӣ Мақомоти иҷроияи ҳокимияти давлатии ноҳияи Ховалинг аз моҳи сентибр корҳои мустаҳкамкуниро дар соҳилҳои дарёчаи Оби мазор оғоз намуданд ва ҳамарӯза сокинони се деҳа ба ҳашар мебароянд.
Тавре  ки Абдулманон Абдулалимов, сокини ноҳияи  Ховалинг иброз дошт, ба ин мавзеъ техникаи соҳавӣ низ чалб гардида, он дар кори соҳилбандӣ кумак мерасонад. 
Ба гуфти роҳбарияти мақомоти иҷроия тадбирҳои андешидашуда барои мустаҳкам намудани соҳилҳо саривақтӣ буда, то моҳи март идома меёбанд. Дар ҳамин замина таъмир ва навсозии пули назди деҳаҳои номбаршуда ба нақша гирифта шудааст ва он аз ду ҷониб 24 метри дигар дароз карда мешавад. Ин имкон медиҳад дар ҳама фасли сол ҳаракати нақлиёт ва сокинони се деҳа таъмин гардад. 
Ҳамин гуна корҳои мустаҳкамкунии соҳилҳо бо дастгирии ҳокимияти маҳаллӣ дар дигар ҷамоатҳои деҳот низ оғоз гардидаанд.