Кумак ба Хомисаи маъюб аз ҷониби Кумитаи кор бо занон ва оила

Душанбе, 22.10.2015. (АМИТ «Ховар», ). — Кормандони  Кумитаи кор бо занон ва оилаи назди Ҳукумати ҶТ  20 октябр  ба аёдати маъюби гурӯҳи якум, донишҷӯи курси панҷуми Донишгоҳи давлатии омӯзгории Тоҷикистон ба номи устод Садриддин Айнӣ Хомиса рафтанд. Ин донишҷӯдухтар аз хурдӣ аз  бемории буғумдард азият кашида,  аз соли 2012 бемориаш шадидтар гардиду ӯро аз пой афтонд. Падари Хомиса дар муҳоҷират мебошад, зеро  ду фарзанди ӯ аз оқибатҳои никоҳи хешу таборӣ бемор гардида,  барои табобат доруҳои қимат истифода мебаранд. 
Хомиса мисли дигар ҳамсолони худ дар дил орзуҳои зиёд дорад, вале беморӣ намегузорад, ки ӯ ба донишгоҳ  раваду аз орзуҳои ҷавонии худ баҳраманд гардад.
Кормандони кумита ба оилаи Хомиса як миқдор маводи хӯрокӣ  тақдим намуданд. Ин аёдати  кормандони кумита Хомисаро руҳбаланд намуда, ӯ изҳори миннатдории худро ба ҳамаи онҳое, ки ӯро дастгирӣ менамоянд, баён намуд.