М.Хидирзода: Падару модарон бояд барои бартараф намудани камбудиҳо мусоидат намоянд

Душанбе, 21.10.2015. (АМИТ «Ховар», ). — Гурӯҳи  корӣ дар ҳайати раиси ноҳияи Фирдавсӣ Ҷ.Таварзода, раиси Кумитаи кор бо занон ва оила М.Хидирзода, муовини раиси шаҳри Душанбе Ш.Самадов ва дигарон дар маҳаллаи Қаротегини шаҳри Душанбеи ноҳияи Фирдавсӣ бо аҳолии ин маҳалла мулоқот кард. 
 Дар мулоқот масъалаҳои ҳалталаби ҷомеа, аз ҷумла пешгирии гароиши ҷавонону занон ба ҳизбу ҳаракатҳои ифротӣ, рӯ овардани занон ба фарҳанги бегона ва масъалахои дину дунявият мавриди баррасӣ қарор дода шуданд. Раиси Кумитаи кор бо занон ва оилаи назди Ҳукумати Ҷумҳурии Тоҷикистон М.Хидирзода гуфт, ки онҳо дар давоми 3 моҳи охир бори  сеюм аст, ки дар маҳаллаи мазкур бо сокинон вохӯрӣ мегузаронанд. Раиси кумита  бо мушкилоти занони маҳалла шинос шуда, вобаста ба  вайроншавии оилаҳо ва аз таҳсилот дур мондани духтарон ибрози ақида намуд ва изҳор кард, ки падару модарон бояд барои бартараф намудани ин камбудиҳо мусоидат намоянд.