Мардуми Варзоб ҳодисаи нангини 4 сентябрро қотеона маҳкум мекунанд

Душанбе, 05.10.2015. (АМИТ «Ховар»). — Дар маҷлиси  якҷояи кормандони  бахши Хадамоти муҳоҷират ва шуъбаи Агентии меҳнат ва шуғли аҳолии ноҳияи Варзоб фоҷиаи рўзи 4 сентябри соли равон рухдода баррасӣ шуда, иштирокдорон ин амалро  қотеона  маҳкум намуданд.
Мудири бахши Хадамоти муҳоҷират дар ноҳияи Варзоб Неъматулло Сафаров иброз намуд, ки ҳодисаҳои чанд вақти охир нишон доданд, ки кинаву адоват ва бадбинию хусумат ҳанўз аз замони ба имзо расидани Созишномаи истиқрори сулҳ ва ризояти миллӣ дар Ҷумҳурии Тоҷикистон соли 1997 аз зеҳну хотираи тарафдорони ИНОТ ва намояндагони Ҳизби Наҳзати Исломии Тоҷикистон пок нагаштаанд ва ба ҳар роҳу васила монеи рушди ҳамаҷониба мегарданд. Махсусан аъзои ҲНИТ бо истифода аз эҳсосоти динии мардум онҳоро ба гумроҳӣ кашида, ниятҳои нопоки худро амалӣ месозанд.
Мисоли равшани ин гуфтаҳо ҳодисаи рўзи 4 сентябри соли 2015 рухдода мебошад, ки таҳти роҳбарии  собиқ муовини вазири мудофиа Абдуҳалим Назарзода анҷом дода шуд. Рафтору кирдори ношоистаю хиёнаткоронаи собиқ сардори дастаи таъминоти махсуси милитсияи ВКД Гулмурод Ҳалимов бори дигар нишон дод, ки дар кишвари мо ғаразҳову бегонапарастиҳо аз байн нарафтаанд. Генерали хиёнаткор бо гурӯҳи ҷиноятпешаи худ бори дигар фазои орому осудаи кишварро ноором гардонида,  бори дигар хостори ҷанги шаҳрвандӣ дар Тоҷикистон шуд. Ин амали хиёнаткоронаю паймоншикании «ҳоҷӣ — генерал» собит сохт, ки ў ва дигар намояндагони ИНОТ ҳеҷ гоҳ ободии Ватан, осудагии халқ ва пешрафти кишварро намехоҳанд.
Маҳз ҳамин рафтори эшон боис гардид, ки дар кишвар беш аз ҳазорон нафар аз сафи Ҳизби наҳзати исломӣ даст кашиданд ва дар ноҳияҳо фаъолияти худро қатъ намуданд.
Иштирокдорон  ин ҳодисоти рухдодаро сахт маҳкум карда, аз  мардуми шарифи Тоҷикистон даъват намуданд, ки ҳушёрӣ ва зиракиро аз даст надиҳанд, фирефтаи ҳама гуна дасисабозону ҷиноятпешаҳо нашаванд, аз паси ободии кишвари азизу маҳбубамон камар бубанданд.