Машваратҳои сиёсӣ байни вазоратҳои корҳои хориҷии Тоҷикистон ва Муғулистон

Душанбе, 13.10.2015. (АМИТ «Ховар»).- 12 октябри соли 2015 дар шаҳри Душанбе таҳти роҳбарии муовини вазири корҳои хориҷии Ҷумҳурии Тоҷикистон Низомиддин Зоҳидӣ ва Котиби давлатии Вазорати корҳои хориҷии Муғулистон Дамба Ганхуяг нахустин машварати сиёсии ду кишвар баргузор шуданд.
Дар ҷараёни машваратҳо табодули назари судманд роҷеъ ба ҳолат ва дурнамои рушди муносибатҳои дуҷониба дар арсаҳои сиёсӣ, иқтисодию тиҷоратӣ, кишоварзӣ, саноатӣ, илмию фарҳангӣ ва консулӣ сурат гирифт. Роҳҳои татбиқи амалии мувофиқатҳое, ки аз натиҷаи музокироти сатҳи олӣ моҳи сентябри соли 2014 дар Душанбе бармеоянд, баррасӣ ва тарҳрезӣ шуданд.
Ҷонибҳо омодагии худро ҷиҳати тақвияти ҳамкории судманд дар ҳамаи самтҳое, ки ба тавсеаи минбаъдаи робитаҳои дуҷонибаю бисёрҷониба мусоидат хоҳанд кард, изҳор намуданд.