Нақши бахши хусусӣ дар таъсиси ҷойҳои нави корӣ

Душанбе, 09.09.2015, (АМИТ «Ховар») — Дар  Вазорати меҳнат, муҳоҷират ва шуғли аҳолии Ҷумҳурии Тоҷикистон 8 октябр дар мавзўи «Нақши бахши хусусӣ дар таъсиси ҷойҳои нави корӣ» бо иштироки роҳбарият, кормандони дастгоҳи марказӣ, олимон ва мутахассисони соҳаи меҳнат ва шуғли аҳолӣ семинар баргузор гардид.
Нишасти мазкур дар доираи таҷлили нахустин солгарди «Рўзи соҳибкор» ва баргузории «Форуми байналмилалии соҳибкории Душанбе — 2015» ба нақша гирифта шудааст, ки он таҳти шиори «Саҳми соҳибкориву сармоягузорӣ дар рушди устувор» 14 -уми октябри соли ҷорӣ баргузор мегардад.
Дар чорабинӣ муовини вазири меҳнат, муҳоҷират ва шуғли аҳолӣ Маҳмадуллозода Нурулло оид ба тақвият додани «Нақши бахши хусусӣ дар таъсиси ҷойҳои нави корӣ»  сухан гуфт.
Бояд зикр кард, ки дар  семинар олимон ва мутахассисони соҳаи меҳнат ва шуғли аҳолӣ доир ба  тамоюли афзоиши ҳиссаи бахши хусусӣ дар таъсиси ҷойҳои нави  корӣ дар соҳаҳои иқтисоди Ҷумҳурии Тоҷикистон, рушди соҳибкорӣ ҳамчун самти асосии таъмини шуғли аҳолӣ, таҷрибаи фаъолияти мақомоти меҳнат ва шуғли аҳолӣ дар таъсиси ҷойҳои кории иҷтимоӣ тавассути  рушди соҳибкорӣ, вазъи ҳифзи меҳнат барои ташкили ҷойҳои нави корӣ ва мавқеи Хадамоти назорати давлатӣ дар соҳаи меҳнат, муҳоҷират ва шуғли аҳолии вазорат дар ин раванд мубодилаи афкор намуданд.