Нигаронии А. Абдуллозода аз фаъолияти сусти федератсияҳои варзишии кишвар

Душанбе, 08.10.2015 (АМИТ «Ховар»).-Чанде пеш дар Кумитаи ҷавонон, варзиш ва сайёҳӣ мулоқоти Аҳтам Абдуллозода бо роҳбарони федератсияҳои варзишии мамлакат доир гардид.
Дар мулоқот Аҳтам Абдуллозода фаъолияти федератсияҳои варзиширо мавриди таҳлил қарор дода, аз фаъолияти суст ва ҳамчунин сари вақт пешниҳод накардани гузоришу ҳисоботи баъзе федератсияҳо изҳори нигаронӣ кард.
Абдуллозода таъкид дошт, ки то имрӯз бештар аз 51 федератсияи варзишӣ бо кумита шартномаи ҳамкорӣ доранд, аммо ба назар мерасад, ки баъзе аз онҳо уҳдадориҳои худро иҷро накардаанд. Гуфта шуд, ки фаъолияти федератсияҳои намуди ғайриолимпӣ нисбат ба намудҳои олимпӣ хубтар ба назар мерасад. Ин дар ҳолест, ки ба намудҳои олимпӣ бештар афзалият дода мешавад.
А.  Абдуллозода аз дастгириҳои пайвастаи Ҳукумати мамлакат нисбат ба соҳаи варзиш ёдовар гардида, изҳор намуд, ки таъсиси Ҷоизаи Президент барои ғолибону ҷоизадорони мусобиқаҳои байналмилалӣ шоҳиди ин гуфтаҳост.
Раиси кумита аз роҳбарони тамоми федератсияҳои варзишӣ даъват ба амал овард, ки ҷиҳати баргузор намудани мусобиқаҳои нақшавӣ, пешниҳод намудани варзишгарони беҳтарин ба мусобиқоти сатҳи байналмилалӣ, одилона доварӣ намудани доварон дар мусобиқаҳои варзишӣ ва дар маҷмӯъ, дар сатҳи зарурӣ ба роҳ модани фаъолият табдирҳо андешида, ҳамкориро бо Кумитаи ҷавонон, варзиш ва сайёҳӣ пурзӯр намоянд.