Парлумон Созишномаи байни Тоҷикистону Қазоқистонро ба тасвиб мерасонад

         Душанбе, 19.10.2015.(АМИТ «Ховар»).-Интизор меравад, ки палатаи поёнии Парлумони Тоҷикистон Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Қазоқистон оид ба ҳамкорӣ дар соҳаи мудофиаи гражданӣ, пешгирӣ ва рафъи ҳолатҳои фавқулоддаро дар ояндаи наздик ба тасвиб расонад. Масъалаи мазкур 19 октябр дар ҷаласаи Шӯрои палатаи поёнии Парлумони  Тоҷикистон, ки таҳти раёсати Шукурҷон Зуҳуров, раиси Маҷлиси намояндагон баргузор гардид, баррасӣ шуд. 
    Дар ҷаласа ҳамзамон лоиҳаи қонунҳои Ҷумҳурии Тоҷикистон «Оид ба ворид намудани илова ба Қонуни Ҷумҳурии Тоҷикистон «Дар бораи ҳаракат дар роҳ», «Дар бораи Буҷети давлатии Ҷумҳурии Тоҷикистон барои соли 2015», «Дар бораи адвокатура ва фаъолияти адвокатӣ», «Дар бораи санадҳои меъёрии ҳуқуқӣ», «Дар бораи монополияҳои табиӣ» матраҳ гардиданд. Бархе аз масъалаҳои баррасишуда барои муҳокима ва қабул ба ҷаласаи навбатии иҷлосияи дуюми Маҷлиси намояндагон пешниҳод шуд.