Пешниҳоди филмҳои донишҷӯёни тоҷик ба озмуни “Бастау”

Душанбе, 19.10.2015. (АМИТ «Ховар ).-Бо ибтикори  ректорат ва кафедраи   режиссураи факултаи фарҳангшиносии  Донишкадаи давлатии фарҳанг ва санъати Тоҷикистон  ба номи Мирзо  Турсунзода бори нахуст ду филми шогирдони ин донишкада  бо номҳои “Хобидан мехоҳам” ва “Гули бахт”  пешкаши устодону муҳассилини ин даргоҳ  ва меҳмонон гардид. 
Тавре ки иттилоъ дода шуд, аллакай ин ду филм барои иштирок ба ҷашнвораи кинофестивали  байналхалқии донишҷӯён- “Бастау” (“Сароғоз”) — и Ҷумҳурии Қазоқистон  пешниҳод гардидааст, ки ин ҷашнвора аз 20- ум  то 25- уми октябри соли равон идома мекунад.
Филми “Хобидан мехоҳам” ба мавзӯи муҳоҷират рабт дорад ва  сӯйистифода аз меҳнати ҷисмонии наврасонро мазаммат намудааст.
 “Гули бахт” низ бозгӯи  масъалаҳои иҷтимоист ва   ҳаёти як ҷавонзани муҷарради тоҷикро инъикос  менамояд, ки  дар ниҳояти кор ба хотири парасторӣ  кардани ду наврас падари онҳоро ба ҳамсарӣ қабул менамояд.