Роберт Гейтс: Сиёсати Амрико дар Сурия «девонагӣ» аст

Душанбе, 21.10.2015. (АМИТ «Ховар).-Роберт Гейтс, вазири дифои собиқи Амрико сиёсатҳои давлати ин кишвар дар Сурияро «девонагӣ» хонд. Бинобар гузориши «Пресс ТВ», Гейтс дар гуфтугўи телевизионӣ бо «Фокс Нюс» гуфт: «Ба назари ман тарҳи омўзиши афроди хориҷ аз Амрико ва равон кардани онҳо барои ҷанг комилан девонагӣ аст ва корсоз нахоҳад буд».
Вай ҳамчунин аз барномаи Пентагон барои омўзиши пайкорҷўёни мухолифи давлати Сурия ва харҷи 500 миллион доллар барои ин тарҳ ба шиддат интиқод кард. Теъдоди пайкорҷўёни омўзишдида дар ин тарҳ камтар аз 10 нафар аст. Вазири дифои пешини Амрико гуфт: «Аз шахси хосе ном намебарам, аммо ба назар мерасад афроде дар Кохи Сафед ҳастанд, ки  ҳамвора Обамаро таҳрик мекунанд ва ба ў мегўянд артиш ба дунболи маҳдуд кардани вай аст». Гейтс идома дод. ин афрод ба Обама мегўянд: «Артиш мехоҳад барои ту мушкилӣ эҷод кунад, мехоҳад туро маҷбур ба анҷоми коре кунад, ки моил ба иҷрои он нестӣ».
Бар асоси гузориши Пентагон шумори зиёде аз ҳудуди 100 нафари мухолифи давлати Сурия пас аз омўзиш ва ворид шудан ба минтақаи ҷангӣ аз гурўҳҳои Аннусра фирор карданд ва теъдоде аз ин нафарон силоҳҳои худро ба гурўҳи террористии вобаста ба Алқоида доданд. 
Пентагон рўзи душанбеи ҳафтаи гузашта бинобар хабаргузории «Пресс ТВ»  панҷоҳ тонна силоҳ ва таҷҳизоти ҷангӣ барои мухолифони давлати Сурия ирсол кардааст.