Шарҳи рушди иқтисодӣ дар Аврупо ва Осиёи марказӣ

Душанбе, 30.10.2015. (АМИТ «Ховар»).- Дар мулоқоти роҳбарияти Бонки миллии Тоҷикистон бо ҳайати намояндагии Бонки ҷаҳонӣ таҳти сарварии сариқтисодчии Идораи минтақавии Бонки ҷаҳонӣ оид ба Аврупо ва Осиёи марказӣ Ҳанс Тиммер, ки 29 октябр баргузор шуд, шарҳи рушди иқтисодӣ дар Аврупо ва Осиёи марказӣ, ноустувории болоравии иқтисодӣ дар ин минтақаҳо ва дурнамои таҳкими ҳамкории дуҷонибаи ин ташкилоти молиявӣ бо Бонки миллӣ муҳокима гардиданд.
Дар ҷараёни суҳбат ҷонибҳо оид ба таҳлили нархҳои нефт, қурбҳои воқеии мубодилавӣ, зарурияти мутобиқ шудан ба воқеияти нави нархҳои пасти нафт ва таъмини чораҳои мақсаднок барои дастгирии иҷтимоии аҳолӣ мубодилаи афкор намуданд.
Дар робита ба ин муовини  якуми раиси Бонки миллии Тоҷикистон Ҷ. Нуралиев иттилоъ дод, ки бо назардошти ба эътидол омадани вазъи бозори хариду фурӯши доллари нақди ИМА ва бо мақсади ба низоми қурби ягонаи мубодилавӣ гузаштан, бо дастури Бонки миллӣ қурби хариду фурӯши доллари нақди ИМА аз ҷониби ташкилоти қарзӣ муқаррар мешавад.
Номбурда таъкид кард, ки мақсад аз ҷорӣ кардани механизми нави муқаррарсозии қурби асъори нақдӣ, пеш аз ҳама, кам кардани фарқияти байни қурбҳо, пешгирӣ кардани фарқияти назарраси даромади амалиёти ҳаннотӣ, танзиму таъмини шаффофияти фаъолияти мубодилавии муассисаҳои ташкилоти қарзӣ ва тадриҷан гузаштан ба низоми қурби ягонаи мубодилавӣ мебошад.
Оид ба ҷанбаҳои мусбат ва манфии гузариши зина ба зина ба  қурби ягонаи мубодилавӣ, таъмини фаъолияти муназзаму босуботи бозори дохилии асъор ва муътадилии қурби пули миллӣ Ҳанс Тиммер ва аъзои дигари ҳайати Бонки ҷаҳонӣ андешаҳои худро баён карданд.