Қадамҳои устувори Кумитаи ҷавонон дар самти пешгирии хариду фурӯши одамон

Душанбе, 20.11.2015. (АМИТ “Ховар”). -19 ноябри соли ҷорӣ бо ибтикори Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон дар ноҳияи Бобоҷон Ғафурови вилояти Суғд маҳфили минтақавии ҷавонон оид ба пешгирии хариду фурўши одамон дар доираи маблағҳои «Барномаи миллии рушди иҷтимоии ҷавонон дар Ҷумҳурии Тоҷикистон барои солҳои 2013-2015» таъсис дода шуд.
Дар вазъияти имрўза таъсис додани чунин маҳфилҳо метавонад заминаи мусоидеро барои дастрасии иттилооти муфиду саривақтӣ ба ҷомеа, алалхусус ҷавонон муҳайё гардонад.
Дар маҳфил муовини раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Амирбекзода Ҳабибулло, муовини раиси мақомоти иҷроияи маҳаллии ҳокимияти давлатии ноҳияи Бобоҷон Ғафуров Хуршед Сатторзода бо аъзои маҳфил суҳбат ороста, оид ба мақсад, вазифаҳо, самтҳои фаъолият ва дурнамои маҳфил ба ҷавонон маълумот дода, нақши онҳоро оид дар кори маълумотнок гардонидани ҳамсолонашон баланд арзёбӣ карданд.