Ассошиэ́йтед Пресс: «Покистону Тоҷикистон дар соҳаҳои энергетика, мудофиа ва савдо ба мувофиқа расиданд»

Душанбе, 13.11.2015. (АМИТ «Ховар»).-Сафари давлатии  Президенти Ҷумҳурии Тоҷикистон Эмомалӣ Раҳмон ба Ҷумҳурии Исломии Покистон дар расонаҳои дохилии ин кишвар фарох инъикос ёфта, дар онҳо масъалаҳои барои ҳар ду ҷониб ва дар маҷмӯъ барои  минтақа муҳим дарҷ гардидаанд. Сомонаи расмии Ассошиэ́йтед Пресси Покистон (АПП) интишор кардааст: «Покистон ва Тоҷикистон оид ба ҳамкории қавитар дар соҳаҳои энергетика, мудофиа ва савдо  ба мувофиқа  расиданд, ки он  дар густариши минбаъдаи робитаҳои дуҷонибаи ҳар ду кишвар мусоидат менамояд». 
Ҳамчунин АПП дар сомонаи худ мақолае бо номи “Maмнун Ҳусейн ва Эмомалӣ Раҳмон барои таҳкими минбаъдаи ҳамкории Покистону  Тоҷикистон дар соҳаҳои гуногун ба мувофиқа омаданд»-ро мунташир кардааст, ки муҳтавои он чунин аст: «Президенти  Покистон  Мамнун  Ҳусейн ва Президенти Ҷумҳурии Тоҷикистон Эмомалӣ Раҳмон барои таҳкими минбаъдаи ҳамкории дуҷонибаи Покистону Тоҷикистон дар самтҳои гуногуни мавриди таваҷҷуҳи ду кишвари бародар  ба мувофиқа расиданд».
«Сарвазири  Покистон Муҳаммад Навоз Шариф  ва Президенти Ҷумҳурии Тоҷикистон Эмомалӣ Раҳмон зимни мулоқот  роҳҳои таҳкиму густариши минбаъдаи муносиботи дуҷониба, махсусан дар соҳаҳои савдо, энергетика ва алоқаро  мавриди баррасӣ қарор доданд», — омадааст дар ВАО-и Покистон.